【重要】收到准考證後必做嘅事

相信同學喺依幾日都會開始收到准考證，喺收到准考證有咩要即刻做？記得做唒以下嘅check list!

1️⃣ 實地考察所有考場

有啲時間唔可以慳，我建議同學一定要去所有考場行一次，搵清楚考場

附近有冇啲地方可以比你早到坐底（麥記/餐廳之類），因為如果你早到而學校又未開比同學入嘅話，你就要喺考場門口食風。如果冇地方比你白坐，可以入茶餐廳叫杯熱茶蜜（飲兩啖好，唔好飲唒）坐底溫下書。
學校正門喺邊，因為有好多學校喺屋村入面，要入咗屋村先可以入到間學校，我個朋友就曾經試過喺考嗰日跟住google map行錯，最後要爬牆入學校。

Google Map只會帶你到考場個位置，但唔會帶你去考場嘅正門，而有好多大嘅學校正門同後門係要兜一大個圈，所以你唔去考察會有機會令你遲到❗️

2️⃣ 睇清楚學校名！

香港有好多校名好似嘅學校，所以一定要睇清楚地址：

Eg. 圓玄一中喺葵涌，圓玄二中喺大埔，圓玄三中喺將軍澳

Eg. St. Paul 有 St. Paul’s Co-ed, St. Paul’s College, St. Paul’s School Lam Tin etc. 仲要有啲地址係好近，所以我強烈建議大家都行一圈❗️

3️⃣ 交通

搵定至少兩種去考場嘅交通方法，最好兩種係唔同（巴士，地鐵），尤其喺慈雲山/秀茂坪同寶馬山考嘅同學，嗰到未必有地鐵去到，如果平時冇乜去嗰邊嘅記得搵清楚交通。

另外，以穩定程度嚟講：

地鐵>巴士>小巴

小巴嘅班次唔準，又冇APP比你睇，而且喺中途站上有機會冇位，如果喺總站上繁忙時間可能要等兩三班車，所以盡量唔好撘小巴。

如果屋企人有車嘅，盡量麻煩屋企人車你啦~

記德預計埋去考場嘅時間，咁就萬無一失啦。

最新文章